[潮童焗飯] 精選常餐 – 民華餐廳

即烘牛油多士,外脆內軟,又唔會太乾(比較下,北海道牧場餐廳既多士乾到核爆),牛油味十足,好香口;民華既炒蛋都係水準以上,Pretty but not perfect;多款揀過澳牛;又坐得耐D,咪揀去民華囉。

好多朋友都問我鍾意食咩。老老豆豆,常餐絕對Favorite List入面頭幾位,一黎係香港特色,第二度食唔到;二黎我真係好鍾意食通粉+多士+炒蛋呢個組合;三黎係越簡單既野越難整,好考廚師既功力。澳牛既光速餐,人人都知。我想介紹既係位於旺角金魚街既民華餐廳 (睇題目都知啦,_你)

民華餐廳 – 好食常餐

常餐有分兩段時段收費,早餐多謝$35,Non-早餐盛惠$41。除左野飲之外,有三樣野揀 :麵包項目,蛋項目同粉麵項目。

我自己就鍾意即烘牛油多士 + 雙炒蛋(餐牌無寫有既) + 火腿通粉,然後另叫一個燒賣

常餐餐牌
常餐餐牌

麵包類

識食一定係揀即烘牛油多士。外脆內軟,又唔會太乾(比較下,北海道牧場餐廳既多士乾到核爆),牛油味十足,好香口。不過有樣野要話下,每次既溫度都唔同。即烘呀,大佬,可以保持每次都係熱既得唔得!

即烘牛油多士
即烘牛油多士

炒蛋

我就好鍾食雞蛋,特別係炒蛋,所以每次黎民華都一定係揀雙炒蛋 (講多次,餐牌上無得揀,但係照嗌到),一黎滿足到我既蛋癮,二黎雙份蛋個口感較充實。鍾意既,可以將蛋夾埋落多士到一齊食,個人就喜歡分開食。

即烘牛油多士加雙炒蛋
即烘牛油多士加雙炒蛋

香港最好食既炒蛋,我認為一定係澳牛,蛋香味同質地都無得輸。咁點解黎民華,唔去澳牛呢?咁民華既炒蛋都係水準以上,Pretty but not perfect;又多款揀過澳牛;又坐得耐D,咪揀去民華囉。

潮童炒蛋龍虎榜

你開我有邊間既常餐好食?我有以下選擇(跟好食程度):

  1. 澳洲牛奶公司@佐敦 (題外話,推薦食過既朋友睇下史兄《澳牛的黃昏》一文,好有共鳴)
  2. 華星冰室@灣仔(指定灣仔店)
  3. 民華餐廳@太子
  4. 聯發茶餐廳@九龍城

講多少少,如果你對蛋既質素唔係咁高,唔需要嫩滑,只要份量,咁我介紹你去荃灣既嘉樂冰廳。下面張相係我三年半前去食既情況:近少少果碟係炒蛋,$14,估計用左六隻蛋再加豉油去炒,滑就唔滑嫁啦,但係份量好誇張囉;遠少少,對面朋友叫左個火腿奄列,大份到癲左。有興趣就自己去試啦。

嘉樂冰廳
嘉樂冰廳

粉麵類

我就鍾意揀火腿通粉。有一定水準,通粉彈牙有咬口,唔似普通茶記咁淋哂。另外,呢到既「薑絲豬膶通粉」都係大熱,有興趣可以試下。

扯一扯開,係到要讚下北海道牧場餐廳既湯底,係上面提果四間入面最好味。

火腿通粉
火腿通粉

豬肉燒賣

茶餐廳有得嗌點心,你都咪話唔特別,味道仲要唔錯果下犀利。豬肉燒賣,加多隻蝦係入面,食落實正用足材料,合格。唔好以為食到粒正常既燒賣好易,如果唔去茶樓既話,其實無咩選擇。掃街呢?果尐所謂既魚肉燒賣,大部份都粉到一個點,我稱之為「粉賣,都唔知有無魚肉係入面(唔係講笑,之前新聞都賣過牛丸無牛肉成份)。大年初二係九龍灣夜市嗌左兩串,點知食左幾粒都係粉味十足,嬲到唔食。

豬肉燒賣
豬肉燒賣
豬肉燒賣
豬肉燒賣

讚好「潮童焗飯」Facebook專頁,收受最新既資訊:https://www.facebook.com/modernchildhk

餐廳資訊:
民華餐廳
電話:2392 4880
地址:旺角通菜街153-159號地舖

Comments

comments

潮童焗飯

吃貨一名

3 comments

發表迴響

收取最新資訊

最多人睇

潮童焗飯 Facebook

/* ]]> */